لما تشوف إنهاء ميسي، هتحس إن الفرصة سهلة، عادية وبسيطة، لكن لأ، الفرصة فعلاً مش سهلة، ميسي استلم وسدد أقل من ثانيتين، لأنه بمجرد ملاحظة إستلامه كان أحد لاعبي المكسيك بيضغط عليه زي المجنون، وآخرين أمامه بيحاولوا يقفلوا زوايا التسديد، دا غير اللاعيبة اللي متمركزة داخل المنطقة أمام المرمى، دا غير إن أوتشوا متمركز في نصف المرمى تقريباً، لما تفكر في كل العوامل دي، هتُدرك إن الفرصة مش بسيطة ولا سهلة، وفعلاً، إحتمالية تسجيل الفرصة على مقياس الـxG هي 0.02، متخيل؟ 2% فقط!
بعد إنهاء ميسي، وحسب مقياس الأهداف المتوقعة من التسديدات بين العارضة والقائمين "xGOT" -أي نسبة تسجيل الفرصة بعد خروجها من قدم ميسي- وصلت لـ0.47، كلينيكال بشكل مُخيف يعني، شىء طبيعي لأكتر لاعب في العالم عنده أهداف أكتر من أهدافه المتوقعة في آخر 10 سنين، اللي هو من ساعة ما اخترعوا الموديل أصلاً، ميسي Clinical finisher لدرجة إن بعض محللي الداتا كانوا بيشيلوا تسديداته من الـCriteria بتاعت موديل الـxG عشان يقدروا يعرفوا نسبة التسجيل الطبيعية بعيداً عن خوارق العادة، ببساطة لأن كون ميسي اللي على التسديدة، دا لوحده قادر يخلي نسبة تسجيلها الدوبل!
