لا أظن إني شاهدت في حياتي ظهير عنده القدرات الفذّة
دي على المراوغة في المساحات الواسعة والضيّقة على حدٍ سواء، ويمكن دا شىء ممكن توضَّحه مُعدلات مراوغته الغريبة جداً للاعب بينشط في مركز الظهير، دا بالإضافة لمهاراته الإستثنائية في التحكم بالكرة والقدرة على الإستلام والترويض بسهولة مهما كانت صعوبة التمريرة المُوجَّهة نحوه، لو كنت بتتساءل عن السبب وراء ذلك فالإجابة ببساطة هي الكرة الخماسية!
مارسيلو بدأ يلعب كورة خماسي في سن 9 سنين، دا خلاه يبقى عنده قدرات ممتازة بالكرة وكمان ساعده على ذلك قصر قامته وخفة حركته الواضحة، نادي فلومينينسي ساعتها اكتشف موهبته الكبيرة دي وضمُّه للأكاديمية في سن 13 عام ومن هنا بدأت رحلته في كرة القدم، مارسيلو كان قال في لقاء عام 2016 إنه عايز بعد ما ينهي مسيرته ويعتزل يرجع للعب كرة الصالات تاني، وإنه وحشته جداً الأيام دي ودائماً النوستالجيا بتسيطر عليه، وقال إنه ممكن الموضوع يوصل لإنه "يحترف" كرة الصالات..
مارسيلو في بداياته بالمناسبة كان بيلعب كلاعب وسط أيسر أو Left Midfielder مش كظهير، لكن مع الوقت تحول لظهير ولم يمنعه ذلك من نثر سحره الجميل والأخَّاذ، حتى رقمياً الراجل مُرعب، بنتكلم في ظهير عنده 103 أسيست
في مسيرته وبيملك قدرة غير عادية على إرسال العرضيات بمُختلف أنواعها وتصنيفاتها وبدقة مُبهرة للعين!
مارسيلو هيفضل علامة فارقة في تاريخ الأظهرة الحقيقة،
لا أُخفي إنه مش نوعي المُفضَّل في الأظهرة، لكن تاريخيته لا غُبار عليها وهتفضل لقطاته عايشة في ذهن الجميع مهما مرِّت الأزمنة والسنين، اللاعب اللي أثبت للجميع مدى إستحقاقيته بخلافة إسم بإستثنائية أسطورة الأظهرة اليُسرى التاريخي روبيرتو كارلوس، هيفضل مارسيلو ڤييرا من أهم اللاعبين اللي غيَّروا نظرة الجميع عن مركز الظهير وقادوا ثورة الأظهرة العصرية في اللعبة، من كل قلبي بأتمنى ليه رقصة أخيرة تكون بحجم مسيرته العظيمة وتاريخيته كلاعب، لأنه حقيقي، يستحق ذلك..
